Astanadaǵy Qazmedıa ortalyǵynda baspasóz, radıo jáne ınternet-jýrnalıstıka salasy boıynsha «Úrker-2018» ulttyq syılyǵynyń jeńimpazdary anyqtaldy. Bul syılyq Aqparat jáne kommýnıkasııa mınıstrliginiń bastamasymen BAQ qyzmetkerlerine byltyr birinshi ret berilgen bolatyn.
Ulttyq syılyqty uıymdastyrýshy – «Qazcontent» AQ. Bıylǵy "Úrker" ulttyq syılyǵy "Qazaq" gazetiniń 105 jyldyǵyna arnaldy. Baspasóz ókilderiniń arasyndaǵy bedeldi marapat jýrnalıstıka mártebesin arttyrýǵa jáne onyń kásibı standarttary men krıterıılerin bekitýge, aımaqtardaǵy mýltımedııalyq jýrnalıstıkany damytýǵa, tilshi qaýymynyń azamattyq belsendiligin kóterýge baǵyttalǵan. Konkýrs talantty jýrnalıster men shyǵarmashylyq ujymdardy anyqtaı otyryp, olardyń kásibı jýrnalıstıkany damytýǵa qosqan úlesine qurmet kórsetýdi jáne ótken jyldyń qorytyndysy boıynsha jýrnalıster shyǵarmashylyǵyna qoǵam nazaryn aýdarýdy kózdeıdi.
Dástúr boıynsha bıylǵy «Úrkerge» úmittiler men otandyq medıa ókilderi jáne basqa da mártebeli meımandar eń aldymen qyzyl kilemmen júrip ótti. Tikeleı efırge qosylǵan aqparat quraldaryna suhbat berip, áserlerimen bólisti. Saltanatty jıyn qazaqstandyq BAQ týraly aqparattarmen bólisken beınesıýjetpen jáne jýrnalısterdiń bolmysyn beıneleıtin qoıylymmen bastaldy.
Jýrnalıstıka máselelerin zertteý ınstıtýtynyń dırektory Namazaly Omashev, Májilis depýtaty Darhan Myńbaı, Prezıdent teleradıo kesheniniń dırektory Erlan Bekhojın, saıasattanýshy Saıasat Nurbek, «Qazaqstan tapqyrlar klýby odaǵynyń» prezıdenti Esen Eleýken, О́ńirlik buqaralyq aqparat quraldary qaýymdastyǵynyń vıse-prezıdenti Álibek Áldeneı jáne basqa da elge belgili tulǵalardan quralǵan qazylar alqasynyń sheshimi boıynsha «Úrkerdiń» úzdikteri de málim boldy. Bıylǵy baıqaý 14 atalym boıynsha ótti. Onyń ishinde elordanyń 20 jyldyǵyna arnalǵan materıal men úzdik vaındy anyqtaý ispetti jańa atalymdar bar.
Saltanatty keshte eń aldymen "Úzdik analıtıkalyq materıal" atalymynyń jeńimpazy jarııa boldy. Alǵashqy jeńimpazdyń aty-jónin ataýǵa sahnaǵa shyqqan tanymal mesenat, kásipker Oralbek Botpaı Aqparat jáne kommýnıkasııa mınıstrliginiń uıytqy bolýymen uıymdastyrylǵan ulttyq jobalardy qoldaýǵa árqashan ázir ekenin aıtsa, "Talap" qoldanbaly zertteý ortalyǵynyń jetekshisi Rahym Oshaqbaev jeńimpazdyń esimin habarlady. Úrkerdeı úzdikter shoǵyryn "Kazahstanskaıa pravda" gazetiniń tilshisi Ásel Muqanova bastady.
Al "Úzdik halyqaralyq analıtıkalyq materıal" atalymynyń júldesin Syrtqy ister mınıstri Qaırat Ábdirahmanov tapsyrdy. Atalǵan nomınasııa boıynsha "SentralAzııaMonıtor" basylymynyń tilshisi Sáýle Isabaeva jeńimpaz atandy. Ol bul syılyqqa sońǵy merzimde ǵana materıaldaryn ótkizgenin, jeńisine qatty tolqyp turǵanyn aıtty. Sondaı-aq «Úzdik reportaj» atalymy boıynsha "Today.kz" saıtynyń tilshisi Ilıa Astahov, «Úzdik fotosýret» atalymy boıynsha "Tengrinews.kz" portalynyń fototilshisi Turar Qazanǵapov ozyp shyqty jáne "Astananyń 20 jyldyǵyna arnalǵan materıal" boıynsha «Qazaq gazetteri» JShS qyzmetkeri Ǵalym Omarhan laýreat atandy.
Kesh barysynda BAQ ókilderi jýrnalıstik zertteýdiń júırigi Gennadıı Bendıskııdi eske alyp, áriptesteriniń esteligin tyńdady. Budan keıin "Úzdik jýrnalıstik zertteý» atalymynyń jeńimpazyn jarııalaý úshin sahnaǵa kóterilgen belgili qoǵam qaıratkeri Murat Ábenov otandyq medıada jýrnalıstik zertteý eń kúrdeli, ekiniń biriniń tisi bata bermeıtin batyl janr ekenin atap ótip, sáıkesinshe ony damytý qoǵamnyń ashyqtyǵyn da qalyptastyratynyn, baspasózdiń de bedelin kóteretinin aıtty. Bul nomınasııada "Time.kz" jýrnalısi Asqar Djaldınov jeńimpaz atandy. Sol sııaqty "Ekonomıka men qarjy týraly úzdik materıal" atalymy "Kapıtal.kz" gazetiniń redaksııasyna tıesili bolsa, «Úzdik suhbat" atalymy «Aıqyn» gazetiniń jýrnalısi Gúlzına Bektasovaǵa buıyrdy.
"Nur Otan" partııasy Tóraǵasynyń birinshi orynbasary Máýlen Áshimbaev «Qazaqstan týraly úzdik tanymdyq materıal» atalymynyń jeńimpazyn jarııalaý barysynda "Kim alsa da "Nur Otan" partııasynyń múshesi alsa deımin" dep utymdy ázildedi. Bul syılyqty Yvision.kz tuǵyrnamasynyń ókili Iаkov Fedorov jeńip aldy.
Sıfrly tehnologııalar damyǵan qazirgi kezeńniń aınymas bólshegine aınalǵan vaınerler arasynda alǵash ret jarııalanǵan "Úzdik vaın" atalymyn Aqparat jáne kommýnıkasııa mınıstri Dáýren Abaev tapsyrdy. Mınıstr qazaq baspasóziniń Sher-aǵasy atanǵan Sherhan Murtazanyń áıgili "Jýrnalısterdiń arqalaǵany altyn, jegeni jantaq" degen sózin mysalǵa keltire otyryp, jýrnalısterdiń násibine altyn buıyrsyn degen tilegin jetkizdi. «Úzdik vaın» atalymy Nurlan Batyrovqa buıyrdy.
Sondaı-aq «Úzdik aımaqtyq radıostansa» atalymynda Juldyz FM radıojelisi úzdik dep tanyldy. «Úzdik qazaqstandyq radıostansa» boıynsha «Shalqar» ún toraby ozyp shyqty.
«Úzdik Internet BAQ» atalymynyń júldesin Qazaqstan Prezıdentiniń Baspasóz hatshysy Aıdos Úkibaev pen Senat depýtaty Birǵanym Áıtimova tapsyrdy. Senator óz tilegin aǵylshyn tilinde jetkizdi. Bul atalymda Informburo.kz ujymy jeńimpaz boldy.
Al «Úzdik aımaqtyq baspasóz» atalymynda keshe ǵana Taldyqorǵan qalasynda 100 jyldyq mereıtoıyn atap ótken Almaty oblysynyń «Jetisý» gazeti jeńimpaz atandy.
Sahnaǵa kóterilgen elimizdiń alǵashqy Aqparat mınıstri, Senat depýtaty Qýanysh Sultanov bul kúnniń tek baspasóz merekesi ǵana emes, rýhanııat merekesine aınalǵanyn atap ótip, «Úzdik respýblıkalyq baspasóz» atalymynyń jeńimpazyn jarııalady. Bul atalym boıynsha keler jyly ǵasyrlyq mereıtoıyn atap ótkeli otyrǵan elimizdiń bas basylymy «Egemen Qazaqstan» gazetiniń redaksııasy jeńimpaz atandy. Senator basylym basshysy Darhan Qydyrálige syılyq músinimen birge "Qazaq" gazetiniń eń alǵashqy sany beınelengen baıqaýdyń eń basty estelik kádesyıyn tartý etti. О́z kezeginde basylym basshysy atalǵan sharany uıymdastyrǵan Aqparat jáne kommýnıkasııa mınıstrligine, qazylar alqasyna gazet oqyrmandary atynan rızashylyq bildirip, "Egemen Qazaqstan" gazetiniń búginde Ortalyq Azııa aımaǵyndaǵy eń iri taralymǵa ıe ekenin atap ótti.
"Byltyr bizdiń basylymnyń jýrnalısteri "Úrker" ulttyq syılyǵynyń úsh atalymyna ıe bolǵan edi. Bıyl gazet redaksııasy alyp otyr. Bul Alash qaıratkerleriniń barlyǵy derlik eńbek etken biregeı basylymǵa kórsetilgen qurmet dep bilemin", dedi gazet basshysy.
Aıta ketken lázim, bıyl ekinshi márte ótken bul baıqaý óte joǵary deńgeıde uıymdastyryldy. Máselen, úmitkerler esimi jarııalanyp jatqan kezde alyp ekrandardan olardyń tikeleı kórsetilýi baıqaýdyń shynaıylyǵyn ústeı tústi. Sonymen birge baıqaýdyń laýreaty atanǵan jýrnalısterge estelik músin men qarjylaı júldeler tabystalǵanyn, ár jeńimpaz 1 000 000 teńge kóleminde aqshalaı syılyq pen dástúrli estelik músinge ıe bolǵanyn aıta ketken abzal. Kesh barysy óner sheberleriniń ásem án-kúıimen árlene tústi.
Dýman ANASh, «Egemen Qazaqstan»